كل اللي باقي مني
معدش فيا نخوة ولا جبروت
كل اللي باقي مني فتات من صوت
وحبة كرامة بطويها في ضلوعي
خايف ليجي يوم وتموت
تشفيني بضحك بس
ضحكة من غير صوت
رحال علي قضبانك ودليلي قطر الموت
يعجز لساني لما أشوف دمعك يخرس كلامي سكوت
عطشان أمان وسلسبيل نيلك حياة من بعد موت
شايلك في روحي والتاريخ يشهد واسمك ع الجبين مكتوب
معدش فيا نخوة ولا جبروت
كل اللي باقي مني فتات من صوت
تملي رابط ع الحدود زي طيف شمس النهار لما يعود
كلامي شجن وحزني نغم علي كل عود
تطويني أحلامي ونظرة عنيكي السود
أشوف ملامحي في ترابك أحس حبل الواد مدود
وياخدنى الأمل في صحارى ماليها حدود
إزرع بفاسي جنانين واسقي بعرقي نبت ورود
لسه النخيل طارح وعود الغيطان مشدود
وبكرة أحلى يا بلادي طول ما شراع الأمل مفرود
معدش فيا نخوة ولا جبروت
كل اللي باقي مني فتات من صوت
الشاعر محمدحليم
تعليقات
إرسال تعليق